| 02.04.2008 13:18:01, snerpa |
1940 um haustið keypti Hrossaræktarfélag Gnúpverja Skugga (Adam) fyrir kr. 900.-. 1945 keypti Hrossaræktarfélagið Faxi í Borgarfirði Skugga. Notaður í Vestur-Húnavatnssýslu (á Heggstaðanesi) árið 1951.
Sýningar:
1940 Meðalfell - I verðlaun. Eigandi: Séra Eiríkur Helgason, Bjarnanesi. Stærð: 141 cm
Lýsing: Fríður, mjög fjörlegur, hátt settur og vel borinn háls. Sterklegir hófar. Reglulegar hreyfingar.
1943 Þjórsártún - I verðlaun. Eigandi: Hrossaræktarfélag Gnúpverja. Stærð: 149 cm
Lýsing: nr. 2.
1947 Landbúnaðarsýningin - I verðlaun. Eigandi: Hrossaræktarfélag Faxi.
Lýsing: nr. 1. Sleipnisbikarinn.
1948 Sandlækur - I heiðursverðlaun fyrir afkvæmi. Eigandi: Hrossaræktarfélag Faxi.
Lýsing: Afkvæmin eru væn að vexti og vel gerð en láta lítið yfir sér. Svipurinn er látlaus, vel meðalreist, hlutföll góð, lundin er sæmilega vel vöðvuð áslend. Fætur eru þurrir og framfætur réttir, en á afturfótum ber á kjúkuliðsskekkjum. Hrossin eru dugnaðarleg og mörg búa yfir ágætum reiðhestakostum, hreyfingar eru fjölbreyttar og hreinar, taugar sterkar, lundin góð, þó ekki blíð. Vilji er að jafnaði góður, sum fjörug. Góð kynfesta.
1950 Þingvellir - I verðlaun. Eigandi: Hrossaræktarfélag Faxi.
Lýsing: nr. 4. Stórbrotinn, gangmikill fjörhestur. Hefur allan gang og hreyfingar sæmilega fjaðurmagnaðar, en nokkuð skortir svif í fótaburð. Skortir fríðleika og fínleika, og skapofsi spillir honum sem reiðhesti.
Skuggi vann Sleipnisbikarinn fyrstur íslenzkra stóðhesta. Var það á Landbúnaðarsýningunni í Reykjavik 1947. Sýndur af Ara Guðmundssyni, Borgarnesi. Hann var fjórði bezti hestur á Þingvöllum 1950. Hann kom fram á fleiri sýningum og stóð ætíð í fremstu röð. Skuggi var sérlega vörpulegur og skörulegur hestur, háreistur, en hálsinn heldur djúpur og of holdmikill. Hlutföll sæmileg, fætur þurrir og liðasterkir, en ekki vel réttir í kjúkuliðum, hófbotn siginn á framfótum. Skuggi var sérlega taugasterkur hestur og orkumikill, fjörharður og alvörugefinn, ferðmikill á öllum gangi, skriðgengur. (GB Æ&S I)
Skuggi hefur góða reisningu og fríðleik, þunnan háls en full djúpan. Þá er lendin einnig of stutt miðað við framhlutföll, brjóst og hrygg. Skuggi er fjörugur, gangfimur og fjölhæfur með afbrigðum, eftir því sem stóðhestar gerast. Lundin er glöð og auðsveip. (GB, Búnaðarrit 1944) |
